ប្រែសម្រួល៖ រតនា
ភ្នាក់ងារអន្តោប្រវេសន៍ និងគយសហរដ្ឋអាមេរិក (ICE) បានចាប់ខ្លួនជនអន្តោប្រវេសន៍ខុសច្បាប់ចំនួន ១១,០០០នាក់ក្នុងរយៈពេល ១៨ថ្ងៃដំបូងនៃរដ្ឋបាលលោក Trump ដែលស្មើនឹងមួយភាគបីនៃចំនួនសរុបដែលភ្នាក់ងារនេះបានចាប់ខ្លួនកាលពីឆ្នាំមុនក្រោមការដឹកនាំរបស់អតីតប្រធានាធិបតី Joe Biden។ នេះយោងតាមព័ត៌មានដែល The Post ទទួលបាន។

ការចាប់ខ្លួនទាំងនេះ ដែលជាផ្នែកមួយនៃយុទ្ធនាការបណ្តេញចេញជាទ្រង់ទ្រាយធំរបស់លោកប្រធានាធិបតី Trump បានរួមបញ្ចូលទាំងការចាប់ខ្លួនឃាតកជនជាតិម៉ិកស៊ិកម្នាក់ដែលធ្លាប់ត្រូវបានបណ្តេញចេញពីមុនមក ដែលធ្វើការឱ្យក្រុមឧក្រិដ្ឋជនម៉ិកស៊ិក យោងតាមប្រភពពីក្រសួងសន្តិសុខមាតុភូមិ។

ភ្នាក់ងារ ICE នៅតំបន់ Rio Grande Valley រដ្ឋ Texas បានចាប់ខ្លួន Fernando Vasquez-Mendoza ដែលត្រូវបានកំណត់អត្តសញ្ញាណថាជាឃាតកសម្រាប់ក្រុម Cartel del Golfo ឬក្រុមឧក្រិដ្ឋជនជួញដូរគ្រឿងញៀននិងឧក្រិដ្ឋកម្មម៉ិកស៊ិក។

មិនមានភាពច្បាស់លាស់ថាតើ Vasquez-Mendoza ត្រូវបានបណ្តេញចេញកាលពីពេលណា ឬពេលណាដែលគាត់បានលួចចូលមកសហរដ្ឋអាមេរិកវិញនោះទេ។

អាជ្ញាធរអន្តោប្រវេសន៍សហព័ន្ធក៏បានចាប់ខ្លួនសមាជិកក្រុមឧក្រិដ្ឋជនពន្ធនាគារវ៉េណេស៊ុយអេឡា Tren de Aragua មួយចំនួន និងជនល្មើសផ្លូវភេទលើកុមារជាច្រើននាក់ផងដែរ។

ក្នុងចំណោមសមាជិកក្រុម TdA ដែលត្រូវបានចាប់ខ្លួននៅទីក្រុងញូវយ៉ក មាន Cristian Jose Concepcion-Manrique ដែលបានលួចឆ្លងដែនចូលតាម El Paso កាលពីខែធ្នូ និងមានប្រវត្តិជាប់ទោសពីបទវាយដំ។

យោងតាមប្រភពពីក្រសួងសន្តិសុខមាតុភូមិ ICE បានចាប់ខ្លួនសរុបចំនួន ៣៣,០០០នាក់កាលពីឆ្នាំមុន។

ការកើនឡើងយ៉ាងខ្លាំងនៃការចាប់ខ្លួននេះ មានន័យថា ICE ត្រូវប្រញាប់ប្រញាល់ស្វែងរកកន្លែងបន្ថែមដើម្បីឃុំខ្លួនជនអន្តោប្រវេសន៍ខុសច្បាប់ដែលជាគោលដៅនៃការបង្ក្រាបយ៉ាងធំរបស់លោក Trump។

យោងតាមប្រភពជាន់ខ្ពស់មួយរបស់ ICE បានប្រាប់ The Post ថា ភ្នាក់ងារនេះត្រូវបើកមណ្ឌលឃុំឃាំងចំនួនបួនដែលដំណើរការដោយការិយាល័យពន្ធនាគារនៅថ្ងៃសុក្រ ដើម្បីពង្រីកចំនួនគ្រែ។

ភ្នាក់ងារនេះបច្ចុប្បន្នមានថវិកាសម្រាប់ឃុំខ្លួនអ្នកទោសចំនួន ៤១,៥០០នាក់ ប៉ុន្តែកំពុងចំណាយលើសពីនេះរាប់រយលានដុល្លារ។

ប្រភពដដែលបានបន្ថែមថា ផែនការពង្រីកទីកន្លែងឃុំឃាំងសម្រាប់ជនអន្តោប្រវេសន៍ខុសច្បាប់នេះត្រូវបានរៀបចំតាំងពីខែវិច្ឆិកាមកម្លេះ។

រដ្ឋបាលលោក Trump ក៏បានស្នើសុំកន្លែងបន្ថែមពីក្រសួងការពារជាតិ ដោយបានជម្លៀសជនអន្តោប្រវេសន៍ខុសច្បាប់ដែល “គ្រោះថ្នាក់” បំផុតមួយចំនួនទៅកាន់ Guantanamo Bay ប្រទេសគុយបា។

Guantanamo Bay ជាទូទៅត្រូវបានប្រើប្រាស់សម្រាប់ឃុំខ្លួនភេរវករបរទេសដែលចាប់បានដោយសហរដ្ឋអាមេរិក ប៉ុន្តែតែងតែមានកន្លែងទំនេរប្រមាណ ១២០គ្រែ សម្រាប់ឃុំខ្លួនជនអន្តោប្រវេសន៍ដែលព្យាយាមលួចចូលសហរដ្ឋអាមេរិកតាមឈូងសមុទ្រម៉ិកស៊ិក។

លោកប្រធានាធិបតី Trump មានគម្រោងពង្រីកសមត្ថភាពរបស់ Guantanamo ក្នុងការឃុំខ្លួនជនអន្តោប្រវេសន៍ខុសច្បាប់ ដោយបានចុះហត្ថលេខាលើបទបញ្ជានៅថ្ងៃទី ២៩ ខែមករា ដែលណែនាំឱ្យក្រសួងការពារជាតិ និងក្រសួងសន្តិសុខមាតុភូមិរៀបចំមូលដ្ឋានទ័ពជើងទឹកនេះសម្រាប់អ្នកទោសចំនួន ៣០,០០០នាក់។

ICE ក៏កំពុងទទួលបានការគាំទ្រពីភ្នាក់ងារអនុវត្តច្បាប់ថ្នាក់រដ្ឋ និងមូលដ្ឋានដែលស្ម័គ្រចិត្តទទួលយកជនអន្តោប្រវេសន៍ខុសច្បាប់តាមរយៈកម្មវិធី ២៨៧g របស់ភ្នាក់ងារនេះ ដែលប្រគល់សិទ្ធិឱ្យអាជ្ញាធរមូលដ្ឋានឃុំខ្លួនជនអន្តោប្រវេសន៍ខុសច្បាប់ក្នុងពន្ធនាគាររបស់ពួកគេជំនួសឱ្យ ICE។

រដ្ឋបាលលោក Trump ក៏កំពុងត្រៀមចាប់ផ្តើមឃុំខ្លួនគ្រួសារឡើងវិញ ដែលបានបញ្ចប់ក្រោមរដ្ឋបាលលោក Biden និងនឹងបើកមណ្ឌលដែលបានបិទពីមុនឡើងវិញ៕”